បន្ទាយមានជ័យ៖ កម្លាំងនគរបាលនាថ្ងៃទី១៦ ខែមីនា ឆ្នាំ២០២៣ បានបញ្ជូនសង្ស័យចំនួន ២នាក់ ក្នុងចំណោមបក្សពួក ៦នាក់ ទៅសាលាដំបូងខេត្ត ពាក់ព័ន្ធករណីជិះម៉ូតូ ដេញកាប់យុវជនម្នាក់ បណ្តាលឱ្យរងរបួសនៅក្រុងសិរីសោភ័ណ កាលពីវេលាម៉ោង១១យប់ថ្ងៃទី១៤ ខែមីនា ឆ្នាំ២០២៣។

ស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ សិទ្ធិ ឡោះ បានឱ្យដឹងថា បន្ទាប់ពីចុះស្រាវជ្រាវ រហូតកំណតមុខសញ្ញា កម្លាំងសមត្ថកិច្ចនគរបាល បានឃាត់ខ្លួនជនសង្ស័យចំនួន ២នាក់ ក្នុងចំណោមបក្សពួក ៦នាក់យកមកសួរនាំ។

លោកស្នងការបន្តថា ជនសង្ស័យ ២នាក់ ១-ឈ្មោះ វី សារ៉ាត់ ភេទប្រុស អាយុ ១៨ឆ្នាំ ២-ឈ្មោះ លី ដូច ភេទប្រុស អាយុ ១៩ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ត្រូវបានកសាងសំណុំរឿង បញ្ជូនទៅសាលាដំបូងខេត្តបន្ទាយមានជ័យ ចាត់ការទៅតាមនីតិវិធី។

ជាមួយគ្នានោះលោក ឧត្ដមសេនីយ៍ទោ សិទ្ធ ឡោះ បានដាក់ចេញបទបញ្ជាដល់អធិការក្រុង-ស្រុក ប៉ុស្ដិ៍នគរបាលឃុំ-សង្កាត់ ចូលរួមអនុវត្តឱ្យបានម៉ឺតមាំនូវគោលនយោបាយភូមិ-ឃុំ មានសុវត្ថិភាព ឱ្យបានខ្ជាប់ខ្ជួន ដោយត្រូវបង្ក្រាប់រាល់បទល្មើសផ្សេងៗដែលបង្កអសន្តិសុខដល់សង្គម ជាពិសេសក្មេងទំនើប និងករណីជួញដូរគ្រឿងញៀនជាដើម៕